Saturday, June 26, 2010

កម្ពុជាកំពុងរៀបចំគោលនយោបាយជំរុញផលិតកម្មស្រូវ និងនាំចេញអង្ករ

រដ្ឋាភិបាលកម្ពុជាបានប្រកាសឲ្យដឹងថា ខ្លួនកំពុងតែរៀបចំសេចក្តីព្រាងឯកសារគោលនយោបាយ
ស្តីពីការជំរុញផលិតកម្មស្រូវ និងការនាំចេញអង្កររបស់កម្ពុជា។ កម្ពុជាដែលក្នុងមួយឆ្នាំៗ នៅសល់ស្រូវជាង ៣លានតោនសម្រាប់នាំចេញ។ យុទ្ធសាស្ត្រ និងវិធាន
ការជាច្រើនត្រូវបានលើកឡើងដើម្បីសម្រេចបាននូវ
ទិសដៅនេះ។

រដ្ឋាភិបាល​កម្ពុជា​ បាន​ប្រកាសឲ្យដឹង​នៅចុង​សបា្តហ៍នេះថា​ ខ្លួន​កំពុងតែ​រៀបចំ​គោលនយោបាយ​ស្តីពី​ ការជំរុញ​ផលិតកម្ម​ស្រូវ​ និង​ការនាំចេញអង្ករ​។ គោលនយោបាយ​ បើតាម​រដ្ឋាភិបាល​កម្ពុជា​ លើកឡើង​ក្នុងកិច្ច ប្រជុំ​គណៈរដ្ឋមន្ត្រី​កាលពី​ថ្ងៃសុក្រ​ម្សិលមិញ​ ធ្វើឡើង​ដើម្បី​ជំរុញ​ការអភិវឌ្ឍ​វិស័យ​កសិកម្ម​ក្នុងសន្ទុះ​ និង​ទំហំថ្មី​ ដើម្បី​ពង្រីក​ និងពង្រឹង​មូលដ្ឋាន​កំណើន​សេដ្ឋកិច្ច​ និងបង្កើនល្បឿន​នៃការកាត់បន្ថយ​ភាពក្រីក្រ​ និងលើកតម្កើង​កម្រិត​ជីវភាពរស់នៅ​របស់​ពលរដ្ឋ​

កម្ពុជា​។


កម្ពុជា​ដែលតាម​របាយការណ៍​ក្រសួង​កសិកម្ម​ នៅឆ្នាំ​ ២០០៩​កន្លងទៅ​ ផលិត​បានស្រូវ​ជាង ៧ លានតោន​ និង​នៅសល់​ស្រូវជាង​ ៣ លាន​តោន​ដើម្បីនាំចេញ​។ លោក​នាយករដ្ឋមន្ត្រី​ ហ៊ុន សែន​ កាលពី​ក្នុងកិច្ចប្រជុំ​វេទិកា​រាជរដ្ឋាភិបាល​ និងផ្នែក​ឯកជន​ កាលពីចុង​ខែមេសា ​បានប្រកាសថា​ រដ្ឋាភិបាល​ ចង់ឲ្យ​កម្ពុជា​ក្លាយទៅ​ជាប្រទេស​នាំចេញអង្ករ​ ឬហៅថា «មាសស​» យ៉ាងសំខាន់​នៅលើទីផ្សារ​អន្តជាតិ​។


ដើម្បីធ្វើឲ្យ​សម្រេច​លើគោលនយោបាយ​នេះ​ រដ្ឋាភិបាល​កម្ពុជា​ បានកំណត់​យុទ្ធសាស្ត្រ​ និង​វិធានការ​ជាច្រើន​ដែលរួមមាន​ការបង្កើន​ផលិតភាពស្រូវ​ ការកសាង​ និងកែលម្អ​ហេដ្ឋារចនា​សម្ព័ន្ធ​ផ្លួវថ្នល់​ ធារាសាស្ត្រ​ ថាមពល​អគ្គិសនី​ ការផ្តល់សេវា​បច្ចេកទេស​ និងការកែលម្អ​វិស័យ​កសិកម្ម​ និង​ការស្វែងរក​ទីផ្សារជាដើម​។ ទោះបីយ៉ាងណាគេមិនទាន់ដឹងថា តើសេចក្តីព្រាងគោលនយោបាយនេះនឹងត្រូវបញ្ចប់នៅពេលណាឡើយ។


គួររបញ្ជាក់ថា​ កម្ពុជា​ដែលមាន​ប្រជាជន​ជាង ៨០​ ភាគរយ​ជាកសិករ​ បាននឹងកំពុង​ធ្វើការនាំចេញ​អង្ករ​ទៅកាន់​ប្រទេស​មួយចំនួន​រួចមកហើយ​ដូចជា​នៅក្នុងទ្វីប​អាស៊ី​ អឺរ៉ុប​ជាដើម។​ ប្រទេស​ មួយចំនួន​ដូចជាគូវែត​បានធ្វើការ​បណ្តាក់ទុន​វិនិយោគ​ក្នុងវិស័យ​កសិកម្ម​ដំណាំ​ស្រូវ​នៅកម្ពុជា​។ កម្ពុជា​ដែល​បាន អំពាវនាវ​ដល់​ប្រទេស​នានា​បោះទុន​វិនិយោគ​ក្នុងវិស័យនេះ ​ព្រោះខ្លួន​មិនទាន់ទាញ​ឲ្យអស់​សក្តានុពល​ពីផ្ទៃដី កសិកម្ម​ជាច្រើន​លានហិកតា​របស់ខ្លួន​នៅឡើយ​៕

No comments:

Post a Comment