Sunday, June 6, 2010

បច្ចុប្បន្នភាពកម្ពុជា


លោកស៊ូយ៉ា ស៊ូប៊ឺឌី ធ្វើទស្សនកិច្ចនៅកម្ពុជាជាលើកទី៣ ដើម្បីពិនិត្យមើលស្ថានភាពសិទ្ធិមនុស្ស

អ្នក​រាយ​ការណ៍​ពិសេស​ស្តី​ពី​ស្ថាន​ភាព​សិទ្ធិ​មនុស្ស​នៅ​កម្ពុជា ​លោក​ស៊ូយ៉ា ​ស៊ូប៊ឺឌី​នឹង​មក​បំពេញ​បេសក​កម្ម​នៅ
កម្ពុជា​ ចាប់​ពី​ថ្ងៃ​ទី​៨​ ដល់​ថ្ងៃ​ទី​១៧​ ខែ​មិថុនា​ខាង​មុខ​នេះ។​ នេះ​ជា​បេសក​កម្ម​លើក​ទី​៣​ របស់​អ្នក​រាយ​ការណ៍​
ពិសេស​រូប​នេះ​នៅ​កម្ពុជា​ដោយ​មាន​ការ​ស្វាគមន៍​ពី​មន្ត្រី​រដ្ឋា​ភិបាល​កម្ពុជា​និង​គណ​បក្ស​ប្រឆាំង​ផង​ដែរ​ហើយ​រំពឹង​ថា​មន្ត្រី​រូប​នេះ​នឹង​ជួយ​កែ​ប្រែ​ស្ថាន​ការណ៍​សិទ្ធិ​មនុស្ស​នៅ​កម្ពុជា​ឲ្យ​កាន់​តែ​ប្រសើរ​។

………………………………………………………….

បើ​យោង​តាម​សេចក្តី​ប្រកាស​ព័ត៌​មាន​របស់​ការិយា​ល័យ​ឧត្តម​ស្នង​ការ​ទទួល​បន្ទុក​សិទ្ធិ​មនុស្ស​ប្រចាំ​កម្ពុជា​ ដំណើរ​បេសក​កម្ម​របស់​លោក​ស៊ូយ៉ា​ ស៊ូប៊ឺឌី​ នៅ​ក្នុង​ប្រទេស​កម្ពុជា​ លើក​ទី​៣​នេះ​ គឺ​ផ្តោត​លើ​ដំណើរ​ការ​
វិស័យ​យុត្តិ​ធម៌​។ វិស័យ​យុត្តិ​ធម៌​ដែល​អ្នក​រាយ​ការណ៍​ពិសេស​ស្តី​ពី​សិទ្ធិ​មនុស្ស​នៅ​កម្ពុជា​គូស​បញ្ជាក់​ថា​ គឺ​ជា​ ផ្នែក​មួយ​នៃ​ការ​បន្ត​វាយ​តម្លៃ​របស់​លោក​លើ​ស្ថាប័ន​ដ៏សំខាន់​នេះ​ ដើម្បី​ចូល​រួម​លើក​ស្ទូយ​ និង​ការ​ពារ​សិទ្ធិ​មនុស្ស​ ពោល​គឺ​ ដើម្បី​ឲ្យ​មាន​ការ​ចូល​រួម​ពី​មនុស្ស​ទូទៅ​ ដើម្បី​ធ្វើ​ឲ្យ​មាន​ប្រព័ន្ធ​យុត្តិ​ធម៌​មួយ​ល្អ ​និង​ត្រឹម​ត្រូវ​។ គួរ​បញ្ជាក់​ថា​ នៅ ​ក្នុង​បេសក​កម្ម​លើក​ទី​១​ នៅ​ក្នុង​ឆ្នាំ​ ២០០៩​ អ្នក​រាយ​ការណ៍​ពិសេស​រូប​នេះ​ បាន​ផ្តោត​ជា​សំខាន់​លើ​ការ​ស្វែង​យល់​ពី​ស្ថាន​ការណ៍​សិទ្ធិ​មនុស្ស​ទូទៅ​នៅ​កម្ពុជា​ ក្រោយ​ពី​លោក​ត្រូវ​បាន​ក្រុម​ប្រឹក្សា​សិទ្ធិ​មនុស្ស​ជ្រើស​តាំង​ ឲ្យ​ធ្វើ​ជា​អ្នក​រាយ​ការណ៍​ពិសេស​ជំនួស​តំណាង​ពិសេស​របស់​អគ្គ​លេខា​ធិការ​អង្គ​ការ​សហ​ប្រជា​ជាតិ​ យ៉ាស្ហ​ ហ្គាយ​ ហើយ​បេសក​កម្ម​លើក​ទី​២​របស់​លោក​នៅ​ខែ​មករា​ ឆ្នាំ​ ២០១០​ គឺ​តាម​ដាន​ និង​ពិនិត្យ​មើល​ប្រសិទ្ធ​ភាព​ ការ​ងារ​របស់​ស្ថាប័ន​រដ្ឋ​ទាំង​ឡាយ​ដែល​ទទួល​ខុស​ត្រូវ​ក្នុង​ការ​លើក​ស្ទួយ​ និង​ការ​ពារ​នីតិ​រដ្ឋ​ និង​ដោះ​ស្រាយ ​បញ្ហា​សិទ្ធិ​មនុស្ស​របស់​ប្រជា​ជន​កម្ពុជា​។

អ្នក​រាយ​ការណ៍​ពិសេស​ស្តីពី​ស្ថាន​ភាព​សិទ្ធិ​មនុស្ស​នៅ​កម្ពុជា​នឹង​ ក្រាប​បង្គុំ​ចូល​គាល់​ព្រះ​មហា​ក្សត្រ​ខ្មែរ​ សម្តេច​ព្រះ​បរម​នាថ​ នរោត្តម​ សីហ​មុនី​ និង​លោក​នាយក​រដ្ឋ​មន្ត្រី​ហ៊ុន​ សែន​។​តាម​ការ​គ្រោង​ទុក​លោក​នឹង​ជួប​ពិភាក្សា​ជា​មួយ​នឹង​មន្ត្រី​រដ្ឋា​ភិបាល​កម្ពុជា​ ជា​ពិសេស​ក្រុម​មន្ត្រី​តំណាង​ ឲ្យ​ស្ថាប័ន​ដែល​មាន​ការ​ពាក់​ព័ន្ធ​នឹង​កំណែ​ទម្រង់​ច្បាប់​ និង​យុត្តិ​ធម៌​ និង​មន្ត្រី​នៅ​ក្រសួង​យុត្តិធម៌​ ក៏​ដូច​ជា​ប្រជា​ ពល​រដ្ឋ​ដែល​បាន​ប្រើ​ប្រាស់​ប្រព័ន្ធ​តុលា​ការ​ សង្គម​ស៊ីវិល​ព្រម​ទាំង​ដៃ​គូ​អភិ​វឌ្ឍន៍​នានា​ដែល​បាន​ចូល​រួម​នៅ​ក្នុង​វិស័យ​យុត្តិ​ធម៌​នៅ​ក្នុង​ប្រទេស​កម្ពុជា​។ មន្ត្រី​គណ​បក្ស​ប្រឆាំង​នៅ​កម្ពុជា​ក៏​ត្រូវ​គេ​រំពឹង​ថា​នឹង​មាន​ការ​ជួប​ ពិភាក្សា​ជាមួយ​នឹង​អ្នក​រាយ​ការណ៍​ពិសេស​ស្តី​ពី​សិទ្ធិ​មនុស្ស​របស់​អង្គ​ការ​សហ​ប្រជា​ជាតិ​ដែរ​។ បញ្ហា​ជា​ច្រើន​ ជា​ពិសេស​ទាក់​ទង​នឹង​ប្រព័ន្ធ​យុត្តិ​ធម៌​កម្ពុជា​បច្ចុប្បន្ន​នឹង​ត្រូវ​បាន​គេ​លើក​ឡើង​នៅ​ក្នុង​ដំណើរ​ទស្សន​កិច្ច​របស់​ លោក​ស៊ូយ៉ា ​ស៊ូប៊ឺឌី​នៅ​កម្ពុជា​លើក​នេះ​។

នៅ​ពេល​ទាក់​ទង​នៅ​ថ្ងៃ​អាទិត្យ​នេះ​ ទាំង​មន្ត្រី​រដ្ឋា​ភិបាល​កម្ពុជា​ និង​មន្ត្រី​គណ​បក្ស​ប្រឆាំង​បាន​ស្វា​គមន៍​ ចំពោះ​បេសក​កម្ម​នេះ ​ដោយ​រំពឹង​ថា​នឹង​ទទួល​បាន​កិច្ច​សហ​ប្រតិ​បត្តិ​ការ​ផ្លែផ្កា​ និង​អាច​កែ​ប្រែ​ប្រព័ន្ធ​យុត្តិ​ធម៌​
នៅ​កម្ពុជា​។ ប្រព័ន្ធ​យុត្តិ​ធម៌​ និង​សិទ្ធិ​មនុស្ស​កម្ពុជា​ ដែល​តាម​ការ​កត់​សម្គាល់​របស់​លោក​កឹម ​សុខា ​ប្រធាន​
គណ​បក្ស​សិទ្ធិ​មនុស្ស​ គឺ​មិន​ទាន់​បាន​ឆ្លើយ​តប​នៅ​ឡើយ​ចំពោះ​អ្វី​ដែល​រដ្ឋា​ភិបាល​បាន​សន្យា។​ ដូច្នេះ​ការ​ចុះ​មក​ ត្រួត​ពិនិត្យ​របស់​មន្ត្រី​អង្គ​ការ​សហ​ប្រជា​ជាតិ​នេះ​គឺ​ជា​ការ​ល្អ ​ដើម្បី​កែ​ប្រែ​ចំណុច​អវិជ្ជ​មាន​។ លោក​កឹម​ សុខា​ បាន​ថ្លែង​ថា​ ដំណើរ​ការ​ប្រព័ន្ធ​យុត្តិ​ធម៌​ដែល​ជា​ប្រធាន​បទនៃដំ​ណើរ​ទស្សន​កិច្ច​របស់​លោក​ស៊ូប៊ឺឌី​លើក​ នេះ ​គឺ​ជា​ប្រធាន​បទ​សំខាន់​ ខណៈ​ដែល​ប្រជា​ជន​ខ្មែរ​កំពុង​តែ​ជួប​ប្រទះ​នូវ​ភាព​អយុត្តិ​ធម៌​ និង​ក្នុង​ពេល​ដែល​
រដ្ឋា​ភិបាល​បាន​ប្រើ​ប្រាស់​ឥទ្ធិ​ពល​តុលា​ការ​មក​គាប​សង្កត់​លើ​ប្រជា​ពល​រដ្ឋ​ដែល​បាន​សម្តែង​មតិ​របស់​ខ្លួន​ និង​កំពុង​តែ​ធ្វើ​ការ​ទាម​ទារ​ដី​ធ្លី​របស់​ខ្លួន​ជា​ដើម​។ បើ​តាម​លោក​កឹម​ សុខា ​គឺ​ប្រជា​ពល​រដ្ឋ​កំពុង​តែ​អស់​សង្ឃឹម​ ជា​មួយ​នឹង​ប្រព័ន្ធ​យុត្តិ​ធម៌​កម្ពុជា​។ ដូច្នេះ​វត្ត​មាន​របស់​លោក​ស៊ូយ៉ា ​ស៊ូប៊ឺឌី​ គឺ​នឹង​មាន​សារៈ​សំខាន់​ក្នុង​ការ​កែ​
ប្រែ​បញ្ហា​ទាំង​នេះ​។ ក៏​ប៉ុន្តែ​ការ​លើក​លែង​ថា​ ប្រព័ន្ធ​យុត្តិ​ធម៌​កម្ពុជា​មិន​ដំណើរ​ការ​ល្អ ​មាន​ភាព​អយុត្តិ​ធម៌​នេះ​
ត្រូវ​បាន​ច្រាន​ចោល​ដោយ​មន្ត្រី​រដ្ឋា​ភិបាល​កម្ពុជា​។ លោក​ទិត​ សុធា ​មន្ត្រី​អ្នក​នាំ​ពាក្យ​អង្គ​ភាព​ព័ត៌​មាន​ និង​
ប្រតិ​កម្ម​រហ័ស​របស់​ទីស្តី​ការ​គណៈ​រដ្ឋ​មន្ត្រី​បាន​ថ្លែង​ថា​ អ្វី​ដែល​លើក​ឡើង​ដោយ​មន្ត្រី​គណ​បក្ស​ប្រឆាំង​គ្រាន់​
តែ​ជា​មតិ​រិះ​គន់​តែ​ប៉ុណ្ណោះ​ ប៉ុន្តែ​មិន​បាន​ស្តែង​ពី​ការ​ពិត​នៅ​កម្ពុជា​ឡើយ​។ កម្ពុជា​ដែល​តាម​ការ​អះ​អាង​របស់​ លោក​ទិត​ សុធា​ មាន​ប្រព័ន្ធ​តុលា​ការ​មួយ​ដែល​កំពុង​តែ​ដើរ​លើ​ផ្លូវ​ត្រូវ​ក្នុង​ការ​ផ្តល់​យុត្តិ​ធម៌​ជួន​ដល់​ពល​រដ្ឋ​ខ្មែរ​។

មន្ត្រី​រដ្ឋា​ភិបាល​កម្ពុជា​បាន​បញ្ជាក់​នៅ​ថ្ងៃ​នេះ​ថា​ ទំនាក់​ទំនង​រវាង​រដ្ឋា​ភិបាល​កម្ពុជា ​និង​លោក​ស៊ូយ៉ា ​ស៊ូប៊ឺឌី​ គឺ​មាន​លក្ខណៈ​ល្អ​បំផុត​ និង​មាន​ភាព​ខុស​ប្លែក​គ្នា​ពី​ទំនាក់​ទំនង​ជា​មួយ​នឹង​លោក​យ៉ាស្ហ ​ហ្គាយ​។ ខុស​គ្នា​នៅ​ ត្រង់​ថា​ អ្នក​រាយ​ការណ៍​ពិសេស​ថ្មី​នេះ ​បាន​ស្គាល់​ពី​ស្ថាន​ការណ៍​គោរព​សិទ្ធិ​មនុស្ស​ជាក់​ស្តែង​នៅ​កម្ពុជា​ និង​ បាន​សរ​សេរ​របាយ​ការណ៍​ដោយ​ឈរ​នៅ​លើ​ការ​ពិត​ ស្តាប់​ទាំង​គ្រប់​ភាគី​ទាំង​អស់​មិន​ថា​ រដ្ឋា​ភិបាល​ ឬ​បក្ស ​ប្រឆាំង​ និង​សង្គម​ស៊ីវិល​ទេ​ ពោល​គឺ​លោក​ស៊ូយ៉ា​ ស៊ូប៊ឺឌី​ បាន​ធ្វើ​សំយោគ​របាយ​ការណ៍​ស្តី​ពី​សិទ្ធិ​មនុស្ស​របស់​ លោក​បាន​ល្អ​។ លោក​ទិត​ សុធា​ បាន​បន្ត​ថា​ រដ្ឋា​ភិបាល​រំពឹង​ថា​របាយ​ការណ៍​របស់​លោក​ស៊ូយ៉ា​ ស៊ូប៊ឺឌី​ នឹង​ផ្តល់​ យុត្តិ​ធម៌​សម្រាប់​ការ​គោរព​សិទ្ធិ​មនុស្ស​នៅ​កម្ពុជា​ និង​ស្វាគមន៍​ចំពោះ​អ្នក​រាយ​ការណ៍​ពិសេស​ស្តី​ពី​សិទ្ធិ​
មនុស្ស​នៅ​កម្ពុជា​

No comments:

Post a Comment