Saturday, June 12, 2010

បច្ចុប្បន្នភាពកម្ពុជា


ក្រសួងព័ត៌មាន​បិទកម្មវិធី​ឃោសនា​តាមវិទ្យុ​របស់គណបក្សមួយ​

ដោយ ប៉ែន បូណា (វិទ្យុបារាំងអន្តរជាតិ)


កម្មវិធីឃោសនា​នយោបាយ​តាម​វិទ្យុ​របស់​គណបក្ស​សម្ពន្ធ័​ដើម្បី​ប្រជាធិបតេយ្យ​ដែល​ ដឹកនាំ​​ដោយ​លោក​ខឹម​វសនា​អតីត​អ្នក​តំណាងរាស្ត្រ​គណបក្ស​សម​រង្ស៊ី​វ​បាន​ ក្រសួង​ព័ត៌មាន​បញ្ជា​ឲ្យ​បិទ​ក្រោម​ហេតុផល​ថា​បាន​បំពាន​ទៅ​លើ​សេចក្តី​ ប្រកាស​របស់​ក្រសួង​។​លោកខឹម​​វាសនា​បាន​ចាត់​ទុក​ទង្វើ​នេះ​ថា​ជា​ការ​បំបិទ​សិទ្ធិ​សេរីភាព​និង​ជាការ​រើស​អើង​គណបក្ស​នយោបាយ។

នៅក្នុង​លិខិត​មួយ​ច្បាប់​ចុះ​ថ្ងៃ​ទី​១០​មិថុនា​​លោក​ខៀវ​​កាញារីទ្ធ​​ រដ្ឋមន្ត្រី​ក្រសួង​​ព័ត៌មាន​បាន​បញ្ជា​ឲ្យ​ម្ចាស់​ស្ថានីយ៍​វិទ្យុ​ FM90MHz ​បញ្ឈប់​ការ​ជួល​ម៉ោង​ផ្សាយ​របស់​​ខ្លួន​ទៅ​ឲ្យ​អង្គការ​បណ្តុះ​បណ្តាល​​និងអភិវឌ្ឍន៍​ហៅ​កាត់​ថា​​ DTO​ ដែល​ជា​អង្គការ​មួយ​​ផ្សព្វផ្សាយ​គោល​នយោបាយ​របស់​គណបក្ស​​សម្ពន្ធ័​ដើម្បី​ ប្រជា​ធិបតេយ្យ​របស់​លោក​ខឹម​វាសនា។

លោក​ខៀវ​​កាញារីទ្ធ​​បាន​បញ្ជាក់​នៅ​ក្នុង​លិខិត​នោះ​ថា​​ស្ថានីយ៍​ វិទ្យុ​FM90MHz​ បាន​ជួល​ម៉ោង​ផ្សាយ​ទៅ​ឲ្យ​អង្គការ​ខាង​លើ​ដោយ​បំពាន​លើ​សេចក្តី​ប្រកាស​ របស់​​ក្រសួង​ដែល​ត្រូវ​បាន​ផ្សព្វផ្សាយ​កាល​ពី​ខែ​តុលា​ឆ្នាំ​​២០០៩។​​បើ​ យោង​តាម​ប្រភព​ពី​​មន្ត្រី​ក្រសួង​ព័ត៌មាន​​សេចក្តី​ប្រកាស​នោះ​មាន​ ខ្លឹមសារ​តម្រូវ​ឲ្យ​ម្ចាស់​ស្ថានីយ៍​វិទ្យុ​ទាំង​​ឡាយ​គោរព​សេចក្តី​ណែនាំ​ របស់​ក្រសួង​​ព័ត៌មាន​មុន​នឹង​ចាក់​ផ្សាយ​កម្មវិធី​អ្វី​មួយ។​ទទួល​បាន​ លិខិត​របស់​​ក្រសួង​​ម្ចាស់​ស្ថានីយ៍​វិទ្យុ​​ FM90MHz​​​ បាន​សម្រេច​​បញ្ឈប់​ការ​ជួល​ម៉ោង​ឲ្យ​អង្គការ​ DTO​

លោក​ខឹម​​វាសនា​​ប្រធាន​ក្រុម​ប្រឹក្សា​ភិបាល​នៃ​អង្គការ​នេះ​និង​ក៏ជា​ ប្រធាន​គណបក្ស​សម្ពន្ធ័​ដើម្បី​ប្រជាធិបតេយ្យ​​បាន​ហៅ​ទង្វើ​របស់​ក្រសួង​​ ព័ត៌មាន​ថា​ជា​ការ​បំបិទ​សិទ្ធិ​សេរីភាព​​និង​ជា​ការ​រើស​អើង​គណបក្ស​ នយោបាយ។​ប៉ុន្តែ​​មន្ត្រី​ក្រសួង​ព័ត៌មាន​​បាន​បដិសេធ​ការ​ចោទ​ប្រកាន់​នេះ​ ដោយ​អះអាង​ថា​​នេះ​ជា​បញ្ហា​បច្ចេកទេស​ផ្លូវ​ច្បាប់​​សុទ្ធសាធ​ពោល​គឺ​បញ្ហាបណ្តាល​មក​ពី​ស្ថានីយ៍​វិទ្យុ​ឬ​អង្គការ​ខាង​លើ​មិន​សុំការ​អនុញ្ញាត​ពី​ ក្រសួង​​ព័ត៌មាន។

លោក​ខឹម​វាសនា​​អតីត​តំណាងរាស្រ្ត​គណបក្ស​​សម​រង្ស៊ី​បាន​បង្កើត​គណបក្ស​ សម្ពន្ធ័​ដើម្បី​ប្រជាធិបតេយ្យ​នៅ​ឆ្នាំ២០០៥​​បន្ទាប់​ពី​រូប​លោក​ត្រូវ​បានគេ​បណ្តេញ​ចេញ​ពី​គណបក្ស​សម​រង្ស៊ី។​គណបក្ស​សម្ពន្ធ័​ដើម្បី​ប្រជាធិបតេយ្យក៏​ដូច​ជា​គណបក្ស​​សម​​រង្ស៊ី​​និង​គណបក្សសិទ្ធិ​មនុស្ស​ដែរ​​បាន​ជួល​ ម៉ោង​នៅ​តាម​ស្ថានីយ៍​វិទ្យុ​មួយ​ចំនួន​ដើម្បី​​ឃោសនា​នយោបាយ​ឲ្យ​គណបក្ស​ របស់​ខ្លួន។​​ប៉ុន្តែ​​កម្មវិធី​របស់​គណបក្ស​សម​​រង្ស៊ី​​និង​​គណបក្ស​​ សិទ្ធិ​មនុស្ស​នៅ​តែ​បន្ត​ការ​ផ្សាយ​របស់​ខ្លួន​ជា​ធម្មតា។

ខណៈ​ដែល​ការ​បោះ​ឆ្នោត​កាន់​តែ​ខិត​ជិត​ចូល​មក​ដល់​​ការ​បិទ​កម្មវិធី​ឃោសនា ​​នយោបាយ​របស់​គណបក្ស​សម្ពន្ធ័​ដើម្បី​ប្រជាធិបតេយ្យ​បាន​ធ្វើ​ឲ្យ​ប្រធាន​ គណបក្ស​នេះ​ត្អូញត្អែរ​អំពី​ការ​លំបាក​ក្នុង​ការ​បន្ត​សកម្មភាព​​នយោបាយ​ របស់​ខ្លួន។​លោក​មាន​បំណង​សុំ​អន្តរាគមន៍​ពី​លោក​នាយក​រដ្ឋមន្ត្រី​ហ៊ុន​សែនដើម្បី​បន្ត​កម្មវិធី​ឃោសនា​តាម​វិទ្យុ​ជា​បន្ត​ទៀត៕

No comments:

Post a Comment