បច្ចុប្បន្នភាពកម្ពុជាបក្សសម រង្ស៊ីពិចារណាបង់ប្រាក់ជំនួសលោកស្រី មូរ សុខហួរ
គណបក្សសម រង្ស៊ី កំពុងពិចារណាអំពីការបង់ប្រាក់ជំនួសលោកស្រី មួរ សុខហួរដើម្បីបញ្ចៀសបញ្ហាដែលនឹងកើតឡើងចំពោះលោកស្រីតំណាងរាស្រ្ត របស់ខ្លួន។ គណៈអចិន្ត្រៃយ៍នៃគណបក្សប្រឆាំងបានលើកយកបញ្ហានេះមកពិភាក្សាក្នុង កិច្ចប្រជុំកាលពីថ្ងៃព្រហស្បតិ៍។ យ៉ាងណាក៏ដោយ គណបក្សសម រង្ស៊ីនៅរង់ចាំពិគ្រោះយោបល់ជាមួយលោកស្រីមួរ សុខហួរសិន។ លោកស្រីមួរ សុខហួរដែលកំពុងស្ថិតនៅឯសហរដ្ឋអាមេរិក បានអះអាងមុននឹងចេញដំណើរថា លោកស្រីមិនព្រមបង់ប្រាក់ក្នុងរឿងចាញ់ក្តីលោកនាយករដ្ឋមន្ត្រីហ៊ុន សែនឡើយ។
លោកស្រីមួរ សុខហួរ តំណាងរាស្រ្តខេត្តកំពតនៃគណបក្សសម រង្ស៊ីត្រូវបាន
តុលាការ កំពូលកាត់ក្តីកាលពីថ្ងៃទី ២មិថុនាឲ្យចាញ់លោកនាយករដ្ឋមន្ត្រីហ៊ុន សែនក្នុងបទបរិហាកេរ្តិ៍។ លោកស្រីត្រូវបានតុលាការបង្គាប់ឲ្យបង់ប្រាក់សងជម្ងឺចិត្តលោកនាយក រដ្ឋមន្ត្រីចំនួន ៨លានរៀលនិងប្រាក់ពិន័យចំនួន ៨លាន៥សែនរៀលទៀតត្រូវបង់ចូលថវិកាជាតិ។ ប៉ុន្តែលោកស្រីមួរ សុខហួរមិនទទួលយកការវិនិច្ឆ័យរបស់តុលាការឡើយ ហើយក៏បានបដិសេធមិនព្រមបង់ប្រាក់ដែរ។
ការបដិសេធមិនព្រមបង់ប្រាក់តាមការបង្គាប់របស់តុលាការ អាចធ្វើឲ្យលោកស្រីប្រឈមមុខទៅនឹងទោសជាប់ពន្ធនាគារ។ យ៉ាងណាក៏ដោយ ឥឡូវនេះ គណបក្សប្រឆាំងហាក់បានបន្ទន់ឥរិយាបថបន្តិចហើយ។ លោកគឹម សួរភិរិទ្ធបានពន្យល់ថា ក្នុងនាមជាខ្មែរ គណបក្សរបស់លោកចង់បង្ហាញពីការសម្របសម្រួលដើម្បីបញ្ចប់បញ្ហាដែល អាចនឹងនាំឲ្យជះឥទ្ធិពលអាក្រក់ដល់នយោបាយរបស់គណបក្សប្រឆាំង។ យ៉ាងណាក៏ដោយ អ្នកនាំពាក្យស្តីទីរបស់គណបក្សសម រង្ស៊ីបានអះអាងថា គេនៅរង់ចាំពិគ្រោះយោបល់ជាមួយលោកស្រីមួរ សុខហួរសិនមុននឹងសម្រេចបង់ប្រាក់នេះ។
លោកស្រីមួរ សុខហួរពេលនេះកំពុងបំពេញបេសកកម្មនៅឯសហរដ្ឋអាមេរិក។ លោកស្រីបានចាកចេញពីប្រទេសកាលពីយប់ថ្ងៃទី ១៧មិថុនា ដោយនាំទៅជាមួយនូវញ្ញត្តិដែលមានហត្ថលេខាគាំទ្រពីពលរដ្ឋខ្មែរ ២០០០នាក់ទៅជូនលោកប្រធានាធិបតីសហរដ្ឋអាមេរិក បារ៉ាក់ អូបាម៉ា។ ញ្ញត្តិនេះ មានគោលដៅស្នើឲ្យរដ្ឋាភិបាលលោកអូបាម៉ាជូយអន្តរាគមន៍ចំពោះប្រពន្ធ័ យុត្តិធម៌នៅកម្ពុជាដែលលោកស្រីអះអាងថា «អយុត្តិធម៌» និងមានភាពលំអៀង។
ព័ត៌មានស្តីពីការបង់ប្រាក់ជំនួសលោកស្រីមួរ សុខហួរពីសំណាក់គណបក្សសម រង្ស៊ីហាក់បានធ្វើឲ្យស្ថានការណ៍ធូរស្រាលបន្តិច។ យ៉ាងណាក៏ដោយ គេនៅចាំមើលប្រតិកម្មពីលោកស្រីមួរ សុខហួរសិន ថាតើលោកស្រីសុខចិត្តទទួលយកសំណើរបស់គណបក្សសម រង្ស៊ីដើម្បីបញ្ចប់បញ្ហាឬក៏សុខចិត្តដើរចូលពន្ធនាគារ៕
No comments:
Post a Comment