អតីតព្រះមហាក្សត្រ និងព្រះមហាក្សត្រខ្មែរបញ្ចប់ព្រះទស្សនកិច្ចនៅវៀតណាម
អតីតព្រះមហាក្សត្រ និងព្រះមហាក្សត្រខ្មែរ បានយាងនិវត្តន៍មកដល់ប្រទេសកម្ពុជាវិញហើយនៅ
ព្រឹកថ្ងៃសុក្រនេះ បន្ទាប់ពីបានបញ្ចប់ព្រះទស្សនកិច្ចរយៈពេល ៤ ថ្ងៃនៅប្រទេសវៀតណាម។ ព្រះទស្សន
កិច្ចជាលក្ខណៈឯកជននេះ ត្រូវបានធ្វើឡើង ដើម្បីរឹតចំណងមិត្តភាពនៃប្រទេសទាំងពីរ។ បញ្ហានយោបាយ និងបូរណភាពដែនដី មិនត្រូវបានភាគីទាំងពីរលើកឡើងឡើយ។
តើដំណើរទស្សនកិច្ចជាលក្ខណៈឯកជនរយៈពេល ៤ ថ្ងៃរបស់សម្តេចឪនៅវៀតណាមទទួលបានលទ្ធផលយ៉ាងណាខ្លះ?
យោងតាមសេចក្តីរាយការណ៍របស់ទីភ្នាក់ងារព័ត៌មានវៀតណាម ដំណើរទស្សនកិច្ចរបស់សម្តេចឪ នរោត្តម សីហនុ សម្តេចម៉ែ និងព្រះមហាក្សត្រខ្មែរ រយៈពេលបួនថ្ងៃ ដែលបានបញ្ចប់នៅថ្ងៃនេះ គឺទទួលបាន ជោគជ័យ និងបង្ហាញនូវការរឹតចំណងមិត្តភាពរវាងប្រទេសជិតខាងទាំងពីរ ដែលធ្លាប់មានទំនាក់ទំនងតាំងពី យូរយារណាស់មកហើយ។ ចំណែកមន្ត្រីរដ្ឋាភិបាលកម្ពុជា ក៏បានបង្ហាញពីភាពវិជ្ជមាននៃព្រះដំណើរទស្សនកិច្ចនេះដែរ ដោយបានចាត់ទុកថា ដំណើរទស្សនកិច្ចនេះ នឹងជាកត្តាមួយពង្រឹងទំនាក់ទំនងល្អដែលកម្ពុជា និងវៀតណាមមានស្រាប់ឲ្យកាន់តែមានភាពរឹងមាំបន្ថែមទៀត។ លោកទិត សុធា អ្នកនាំពាក្យអង្គភាពព័ត៌មាន និងប្រតិកម្មរហ័សរបស់ទីស្តីការគណៈរដ្ឋមន្ត្រីបានថ្លែងថា ចំណងមិត្តភាព និងកិច្ចសហប្រតិបត្តិរវាងកម្ពុជានិង វៀតណាមនឹងមានភាពស្អិតរមួត ស្ថិតស្ថេរគង់វង្សជារៀងរហូត ខណៈដែលប្រទេសទាំងពីរជាមិត្ត និងបានតស៊ូ រួមគ្នាកាលពីអតីតកាល។ លោកទិត សុធា បានលើកឡើងទៀតថា កម្ពុជាដឹងគុណជានិច្ចចំពោះវៀតណាមដែលបានជួយរំដោះ ប្រជាជនកម្ពុជាចេញពីរបបប្រល័យពូជសាសន៍ខ្មែរក្រហមនៅថ្ងៃទី ៧ មករា ឆ្នាំ ១៩៧៩។ លោកទិត សុធា បន្តថា ចំណងមិត្តភាព ដែលរឹតបន្តឹងថ្មីៗនេះ នឹងនាំមកនូវការវិនិយោគថ្មីៗទៀតពីសំណាក់ប្រទេសវៀតណាម។
ចុះចំណែកមេដឹកនាំវៀតណាម មានបានលើកឡើងពីបញ្ហាអ្វីខ្លះជាមួយនឹងសម្តេចឪ?
យោងតាមការចុះផ្សាយរបស់ទីភ្នាក់ងារព័ត៌មានវៀតណាម នៅក្នុងព្រះដំណើរទស្សនកិច្ចរបស់សម្តេចឪ បួនថ្ងៃនេះ ព្រះអង្គបានជួបសវនាការជាមួយនឹងឥស្សរជនជាន់ខ្ពស់វៀតណាមជាច្រើនរូបក្នុងនោះរួមមានលោក ប្រធានាធិបតីវៀតណាម ង្វៀន មិញទ្រៀត និងអគ្គលេខាធិការបក្សកុម្មុយនិស្តវៀតណាម ណង ឌឹកម៉ាញ់ជាដើម។មេដឹកនាំវៀតណាមបានអបអរសាទរចំពោះសមិទ្ធផលនានាដែលកម្ពុជាសម្រេចបានក្នុងការអភិវឌ្ឍជាតិកន្លង។ អគ្គលេខាបក្សកុម្មុយនិស្តវៀតណាម បានសម្តែងនូវការដឹងគុណយ៉ាងជ្រៀលជ្រៅចំពោះព្រះមហាក្សត្រ ប្រជាជន និងរដ្ឋាភិបាលកម្ពុជា កាលពីអតីតកាលដែលបានជួយរំដោះ និងបង្រួបបង្រួមជាតិវៀតណាម និងបាន
កសាងមិត្តភាព និងអ្នកជិតខាងល្អ ហើយបន្តការពាររហូតមកដល់បច្ចុប្បន្ននេះ។ ចំណែកឯប្រធានាធិបតីង្វៀង មិញទ្រៀត ក៏បានបញ្ជាក់ថា ប្រជាជាតិវៀតណាមមិនអាចបំភ្លេចគុណកម្ពុជាបានទេចំពោះការជួយជ្រោមជ្រែង
របស់កម្ពុជាកាលពីអតីតកាល រហូតដល់សព្វថ្ងៃ។ ប្រធានាធិបតី វៀតណាម ង្វៀន មិញទ្រៀត បានគូសបញ្ជាក់ថា ព្រះដំណើរទស្សនកិច្ចរបស់សម្តេចឪ នៅក្នុងប្រទេសវៀតណាមបានបង្ហាញយ៉ាងច្បាស់ពីទំនាក់ទំនងរវាង ប្រទេសកម្ពុជា និងវៀតណាមកាន់តែមានភាពជិតស្និទ្ធ និងសំខាន់ឡើង។ លោកង្វៀន មិញទ្រៀត បានថ្លែងថា ប្រទេសកម្ពុជា និងវៀតណាម ក៏ដូចជាប្រទេសជិតខាងឡាវ មានការតាំងចិត្តប្តូរផ្តាច់ធានា និងរឹតនូវចំណងសាមគ្គីភាពជាមួយគ្នា។ ចំណែកឯសម្តេចឪ នរោត្តម សីហនុ និងព្រះមហាក្សត្រខ្មែរ ត្រូវបានទីភ្នាក់ងារ ព័ត៌មានវៀតណាមដកស្រង់ព្រះរាជបន្ទូលថា កម្ពុជា និងវៀតណាមនៅតែបន្តទំនាក់ទំនងមិត្តភាពជាយូរអង្វែង រវាងប្រទេសជិតខាងទាំងពីរ។
ក្រៅពីការរឹតចំណងមិត្តភាព និងកិច្ចសហប្រតិបត្តិការ តើមានការលើកឡើងពីបញ្ហានយោបាយ ឬ បញ្ហាព្រំដែន ដូចដែលមានការស្នើសូមពីគណបក្សប្រឆាំង និងអង្គការក្រៅរដ្ឋាភិបាលខ្លះទេ?
ដូចដែលសម្តេចឪ នរោត្តម សីហនុ និងព្រះរាជលេខាផ្ទាល់របស់ព្រះអង្គ មានបន្ទូលបញ្ជាក់តាំងពីមុន
ការចាប់ផ្តើមព្រះទស្សនកិច្ចម្ល៉េះថា ទស្សនកិច្ចដែលអតីតព្រះមហាក្សត្រ និងព្រះមហាក្សត្រទៅប្រទេសវៀត ណាមគឺមានលក្ខណៈឯកជនសុទ្ធសាធ គឺមិនមានលក្ខណៈនយោបាយទេ។ ទីបំផុតទៅ គឺពិតជាដូច្នេះមែន គ្មានសេចក្តីរាយការណ៍ ឬប្រភពព័ត៌មានណាមួយអះអាងថា សម្តេចឪ នរោត្តម សីហនុ ឬព្រះមហាក្សត្រខ្មែរ លើកឡើងពីភាពមិនប្រក្រតីនានាលើការបោះបង្គោលព្រំដែន ឬការបែងចែកនូវការគ្រប់គ្រងរួមគ្នាលើដែនដី
កម្ពុជា និងកោះត្រល់រវាងកម្ពុជា និងវៀតណាមដូចដែលគ
ណបក្សប្រឆាំង និងក្រុមសង្គមស៊ីវិលខ្លះលើក ឡើ ក៏ដូចជាលោកសឺន ស៊ូប៊ែរ្តិ៍ អនុប្រធានរណសិរ្សជាតិរំដោះប្រជាពលរដ្ឋខ្មែរ បានស្នើសូមអង្គព្រះមហាក្សត្រ
មានព្រះរាជតម្រិះនោះទេ។ គឺមានតែការលើកពីកិច្ចសហប្រតិបត្តិការរវាងប្រទេសទាំងពីរ និងការសន្យា
រក្សាគ្នាទៅវិញទៅមកក្នុងនាមជាប្រទេសជិតខាងល្អ។
ចុះគណបក្សសម រង្ស៊ី ដែលជាអ្នកស្នើសូមឲ្យព្រះអង្គលើកពីបញ្ហាភាពមិនប្រក្រតីនៃការបោះបង្គោល ព្រំដែនជាមួយនឹងវៀតណាមមានអត្ថាធិប្បាយយ៉ាងណាដែរ?
នៅពេលទាក់ទងនៅថ្ងៃសុក្រនេះ លោកយឹម សុវណ្ណ តំណាងរាស្ត្រ និងជាអ្នកនាំពាក្យគណបក្សសម រង្ស៊ី មិនបានបង្ហាញនូវក្តីអស់សង្ឃឹមនោះទេ បើទោះបីជាគ្មានសេចក្តីរាយការណ៍ណាមួយថាសម្តេចឪ និងមេ ដឹកនាំវៀតណាមលើកឡើងពីបញ្ហាបូរណភាពដែនដី។ ប៉ុន្តែលោកនៅតែមានជំនឿថា សម្តេចឪប្រាកដជាបានលើកបញ្ហានេះ នៅក្នុងសវនាការជាមួយនឹងមេដឹកនាំជាន់ខ្ពស់វៀតណាម។ មានជំនឿដោយលោកបញ្ជាក់ថា សម្តេចឪ ជាអង្គព្រះមហាក្សត្រដែលមានបទពិសោធខ្ពស់ក្នុងការដឹកនាំជាតិ ដូច្នេះព្រះអង្គប្រាកដជាបានលើកឡើងពីបញ្ហាបូរណភាព និងព្រំដែនរវាងកម្ពុជា និងវៀតណាម។ បញ្ហាព្រំដែន ដែលលោកយឹម សុវណ្ណ លើកឡើងថាគឺ ជាចំណុចរសើប ដូច្នេះការពិភាក្សាមិនអាចបើកចំហសម្រាប់សាធារណជននោះឡើយ។ លោកបានបន្តថា គណបក្សប្រឆាំងនឹងបន្តធ្វើកិច្ចការត្រួតពិនិត្យលើការបោះបង្គោលព្រំដែនបន្តទៀត មិនត្រឹមតែជាមួយនឹងប្រទេស វៀតណាមទេ ប៉ុន្តែនឹងបន្តទៅភាគខាងលិចជាមួយនឹងប្រទេសថៃ។ ប្រទេសថៃ និងវៀតណាមដែលតាមការ អះអាងរបស់តំណាងរាស្ត្រគណបក្សប្រឆាំង គឺនៅតែបន្តចិញ្ចឹមចិត្តក្នុងការឈ្លានពានកាន់កាប់ទឹកដីខ្មែរដោយខុសច្បាប់ដដែល៕
No comments:
Post a Comment