Tuesday, June 22, 2010

មន្ត្រីកម្ពុជាស្វាគមន៍ការកាត់ទោស ឈុន យ៉ាសិទ្ធិ ដាក់ពន្ធនាគារមួយជីវិត


មន្ត្រី​ជាន់ខ្ពស់​រដ្ឋាភិបាល​កម្ពុជា​បាន​ថ្លែង​ស្វាគមន៍​ នៅថ្ងៃនេះ ​ចំពោះ​ការសម្រេច​សេចក្តី​របស់​តុលា
ការ​សហ​ដ្ឋអាមេរិក​ដែល​បាន​ផ្តន្ទាទោស​អតីត​មេដឹកនាំ​ចលនា​អ្នក​ប្រយុទ្ធ​ខ្មែរ​សេរី​
(CFF) ដាក់​ទោស​អស់​ មួយ​ជីវិត​ បន្ទាប់​ពី​បាន​រក​ឃើញ​ថា​ លោក​បាន​ប៉ុនប៉ង​ក្នុង​ការ​ផ្តួល​រំលំ​រដ្ឋា​ភិបាល​លោក​នាយក​រដ្ឋមន្ត្រី​ហ៊ុន​ សែន​កាលពីឆ្នាំ ២០០០។

លោក​ឧប​នាយក​រដ្ឋមន្ត្រី ​ហោ ​ណាំហុង​ រដ្ឋមន្ត្រី​ក្រសួង​ការបរទេស​កម្ពុជា ​បាន​ថ្លែង​ទៅ​កាន់​ក្រុម​អ្នកយក​ព័ត៌មាន​កាល​ពីព្រឹក​ថ្ងៃពុធ​ថា ​៖«យើង​អបអរសាទរ​ចំពោះ​រដ្ឋាភិបាល​អាមេរិក​ដែល​បាន​សម្រេច​កាត់​
ទោស​ ឈុន​ យ៉ាសិទ្ធិ​នេះ ​ព្រោះ​ពួកនេះ​
[CFF]​ ជាពួក​ភេរវកម្ម។​ អំពើ​ភេរវរកម្ម​នេះ ​មិនមែន​នៅ​តែ​កម្ពុជា​ទេ​ នៅ​សហរដ្ឋ​អាមេរិក​ និង​គ្រប់​ប្រទេស​ទាំងអស់ ​គឺជា​ការគំរាម​កំហែង​ដល់​សន្តិសុខ​ និង​មនុស្ស​ជាតិ​»។

លោក​ ឈុន​ យ៉ាសិទ្ធិ​ ជនជាតិ​ខ្មែរ​ សញ្ជាតិ​អាមេរិក​ មេដឹកនាំ​ចលនា​អ្នក​ប្រយុទ្ធ​ខ្មែរ​សេរី​ ត្រូវ​បាន​តុលាការ​រដ្ឋឡូអែន​ជឺឡេស​កាត់​ទោស​ដាក់​ពន្ធនា​គារ​អស់​មួយ​ជីវិត​កាល​ពីថ្ងៃ​អង្គារ​ម្សិលមិញ​ បន្ទាប់​ពីបាន​រកឃើញ​កំហុស​ថា​ បាន​រៀបចំ​ផែនការ​ក្នុងការ​ផ្តួល​រំលំ​រដ្ឋាភិបាល​លោក​នាយក​ រដ្ឋមន្ត្រី​ហ៊ុន ​សែន​ តាម​រយៈ​រដ្ឋ​ប្រហារ​មិន​បាន​សម្រេច​មួយ។​ រដ្ឋប្រហារ​ដឹកនាំ​ដោយ​ឈុន ​យ៉ាសិទ្ធិ​ បានធ្វើ​ឡើង​កាល​ពីថ្ងៃទី​ ២៤​ខែវិច្ឆិកា​ ឆ្នាំ​ ២០០០​ ដោយ​មាន​ការ​ប្រយុទ្ធ​គ្នា​កណ្តាល​ក្រុង​ភ្នំពេញ ​និង​មាន​ការ​បាញ់​ ចូល​អគារ​រដ្ឋាភិបាល​ និង​ស្ថានីយ​ទូរទស្សន៍​ប៉ុស្តិ៍​លេខ​ ៣​ ផងដែរ​។ ការវាយប្រយុទ្ធរបស់ក្រុម CFF ​ត្រូវបានបើកឡើងប្រឆាំងរដ្ឋាភិ
បាលក្រោមឈ្មោះថា «ប្រតិបត្តិការភ្នំភ្លើង»។

មាន​អាយុ​ ៥៣​ ឆ្នាំ​ ឈុន​​ យ៉ាសិទ្ធិ​​ បាន​ចាក​ចេញ​ពី​ប្រទេស​កម្ពុជា​ទៅ​រស់​នៅ​សហ​រដ្ឋ​អាមេរិក ​នៅ​ក្នុង​ ទស​វត្សរ៍​ឆ្នាំ ​១៩៨០។​ បន្ទាប់​ពីព្រឹត្តិការណ៍​រដ្ឋប្រហារ​មិន​បាន​សម្រេច​របស់​ក្រុម​ CFF​ រដ្ឋាភិបាល​កម្ពុជា​ បាន​
ធ្វើ​ការស៊ើប​អង្កេត​ និង​ឈាន​ដល់​ការ​ចាប់​មនុស្ស​ពាក់​ព័ន្ធ​ចំនួន​ជាង​ ១០០​ នាក់​ និង​ធ្វើ​ការ​ផ្តន្ទា​ទោស​ដាក់​ពន្ធ​ នាគារ​លើ​អ្នក​សង្ស័យ​មួយ​ចំនួន​។ លោក​ហោ ​ណាំហុង​ បាន​ថ្លែង​ថា​ ទង្វើ​ដែល​ក្រុម​
CF​F ធ្វើ​គឺជា​អំពើ
ភេរវកម្ម​។

No comments:

Post a Comment