Friday, June 18, 2010

បច្ចុប្បន្នភាពកម្ពុជា


រថយន្តយោធាជំនួយរបស់ចិនបានមកដល់កម្ពុជាហើយ

ដោយ ជាង សុខា (ភ្នំពេញ ប៉ុស្តិ៍)


អ្នក​នាំ​ពាក្យ​ក្រសួង​ការពារ​ជាតិ​បាន​ថ្លែង​ឲ្យ​ដឹង​ថា រថយន្ត​យោធា​ចំនួន ២៥៧ គ្រឿង​ដែល​ជំនួយ​របស់​ប្រទេស​ចិន​នឹង​មក​ដល់​កំពង់​ផែ​សមុទ្រ​ក្រុង​ព្រះ​សីហនុ ប្រទេស​កម្ពុជា​នៅ​ថ្ងៃ​[សុក្រ]​នេះ។

ឧត្តម​សេនីយ៍​ឯក ឈុំ សុជាតិ អនុ​រដ្ឋ​លេខា​ធិការ និង​ជា​អ្នក​នាំ​ពាក្យ​ក្រសួង​ការពារ​ជាតិ​មាន​ប្រសាសន៍​ថា មន្ត្រី​ក្នុង​ក្រសួង​របស់​លោក និង​អ្នក​បើក​បរ​ត្រូវ​បាន​បញ្ជូន​ទៅ​ក្រុង​ព្រះ​សីហនុ​តាំង​ពី​ថ្ងៃ​ពុធ​ដើម្បី​ទទួល​ការ​ដឹក​ជញ្ជូន​រថយន្ត​ទាំង​អស់​នោះ​តាម​នាវា ហើយ​ពិធី​ប្រគល់​-​ទទួល​ផ្លូវ​ការ​នឹង​ត្រូវ​ប្រព្រឹត្ត​ឡើង​នៅ​រាជ​ធានី​ភ្នំពេញ​នា​សប្តាហ៍​ក្រោយ​រវាង​លោក ទៀ បាញ់ រដ្ឋ​មន្ត្រី​ក្រសួង​ការពារ​ជាតិ និង​មន្ត្រី​ស្ថាន​ទូត​ចិន​ប្រចាំ​នៅ​ប្រទេស​កម្ពុជា។

លោក ឈុំ សុជាតិ បាន​ថ្លែង​ប្រាប់​ភ្នំពេញ​ប៉ុស្តិ៍​កាល​ពី​ថ្ងៃ​ព្រហស្បតិ៍​ថា៖​«ការ​ដឹក​ជញ្ជូន​តាម​នាវា​នឹង​មក​ដល់​តាម​ការ​គ្រោង​ទុក»។

នៅ​ក្នុង​ជំនួប​ជាមួយ​លោក​នាយក​រដ្ឋ​មន្ត្រី​ខ្មែរ ហ៊ុន សែន មុន​ពេល​ប្រារព្ធ​បើក​ពិធី​តាំង​ពិព័រណ៍​ពិភព​លោក​នៅ​ក្រុង​ស៊ាងហៃ ប្រទេស​ចិន​កាល​ពី​ខែ​ឧសភា លោក​ប្រធានា​ធិបតី​ចិន ហ៊ូ ជីនតាវ បាន​សម្រេច​ផ្តល់​ឲ្យ​ប្រទេស​កម្ពុជា​នូវ​រថយន្ត​យោធា​ជា​ច្រើន​គ្រឿង រួម​ជាមួយ​នឹង​ឯក​សណ្ឋាន​យោធា ៥ ម៉ឺន​សម្រាប់​ផង​ដែរ។ ការ​ផ្តល់​ឲ្យ​នេះ​ធ្វើ​ឡើង​រយៈ​ពេល​មិន​ដល់ ១ ខែ​ក្រោយ​ពេល​ដែល​សហរដ្ឋ​អាមេរិក​បាន​លុប​ចោល​កិច្ច​ព្រម​ព្រៀង​ផ្តល់​ជំនួយ​រថយន្ត​ស្រដៀង​គ្នា​នេះ ក្រោយ​ពេល​មាន​ការ​បញ្ជូន​ត្រឡប់​ទៅ​ប្រទេស​ចិន​វិញ​ដ៏​ចម្រូង​ចម្រាស​នូវ​ជន​ជាតិ​ភាគ​តិច​អ៊ុយហួរ ២០ រូប​ដែល​កំពុង​ស្វែង​រក​សិទ្ធិ​ជ្រក​កោន​កាល​ពី​ខែ​ធ្នូ ឆ្នាំ​កន្លង​ទៅ។

ថ្លែង​នៅ​ក្នុង​ពិធី​សម្ពោធ​ដាក់​ឲ្យ​ប្រើ​ប្រាស់​ជា​ផ្លូវ​ការ​នូវ​ស្ពាន​មិត្ត​ភាព​កម្ពុជា​-​ចិន​ព្រែក​ក្តាម ក្នុង​ខេត្ត​កណ្តាល កាល​ពី​ថ្ងៃ​ទី ៣១ ខែ​ឧសភា លោក ហ៊ុន សែន មាន​បំណង​ចង់​ធ្វើ​ព្យុហយាត្រា​ក្បួន​រថយន្ត​ពី​ក្រុង​ព្រះ​សីហនុ​មក​រាជ​ធានី​ភ្នំពេញ។

យ៉ាង​ណា​មិញ លោក ឈុំ សុជាតិ បាន​ថ្លែង​ថា វា​នឹង​ពុំ​មាន​ការ​ធ្វើ​ព្យុហយាត្រា​ក្បួន​រថយន្ត​យោធា​ទេ ហើយ​ពួក​គេ​គ្រាន់​តែ​បើក​មក​រាជ​ធានី​ភ្នំពេញ​ធម្មតា​ប៉ុណ្ណោះ។

រថយន្ត​ទាំង ២៥៧ គ្រឿង​នោះ​រួម​មាន​រថយន្ត​ដឹក​ជញ្ជូន​យោធា ២០០ គ្រឿង រថយន្ត​សង្គ្រោះ​បន្ទាន់ ២០ គ្រឿង រថយន្ត​ដឹក​អគ្គ​មេ​បញ្ជា​ការ ៣០ គ្រឿង រថយន្ត​ជួស​ជុល​ចល័ត ៥ គ្រឿង និង​រថយន្ត​ដឹក​រថក្រោះ ២ គ្រឿង៕

No comments:

Post a Comment