Saturday, July 17, 2010

ព័ត៌មានទាន់ហេតុការណ៍


អាមេរិក​ប្រគល់​វត្ថុបុរាណ​ ៧ ​ដុំ​ឲ្យ​កម្ពុជា​

សហ​រដ្ឋ​អាមេរិក​បាន​ប្រគល់​ត្រឡប់​មក​វិញ​ដល់​ប្រទេស​កម្ពុជា​នូវ​វត្ថុ​បុរាណ​សម័យ​អង្គរ​ចំនួន​ ៧​ ដុំ ដែល​ជា
ផ្នែក​មួយ​នៃការ​ចូលរួម​អបអរ​ពិធី​ខួប​ ៦០​ ឆ្នាំ​នៃទំនាក់​ទំនង​ការទូត​រវាង​ប្រទេស​ទាំងពីរ។​ ពិធី​ប្រគល់​ជា​ផ្លូវការ​ ត្រូវ​បានធ្វើ​ឡើង​នៅព្រឹក​ថ្ងៃអាទិត្យ​ នៅ​សារមន្ទីរ​ជាតិ ​ក្រោម​អធិបតី​ភាព​របស់​លោក​ឧប​ការី​ក្រសួង​ការ​បរទេស​ អាមេរិក​
William ​Burns​ និង​លោកស្រី​ ម៉ែន​ សំអន​ ឧប​នាយក​រដ្ឋមន្ត្រី​ប្រចាំ​ការ​នៃ​រដ្ឋាភិ​បាល​កម្ពុជា។​

លោក​ William​ Burns​ បាន​ថ្លែង​ថា ​វត្ថុ​បុរាណ​ទាំងនេះ​ត្រូវបាន​រកឃើញ​ និង​ចាប់​បាន​នៅ​ក្នុង​ក្រប​ខ័ណ្ឌនៃ​​«ប្រតិបត្តិ​ការ​បុរាណ​វត្ថុ»​ ដែល​ជា​កម្ម​វិធី​ពិសេស​មួយ​ធ្វើ​ឡើង​ដោយ​មន្ត្រី​ផ្នែក​អន្តោ​ប្រវេសន៍​ និង​គយ​របស់​ អាមេរិក​ ក្នុង​ការ​ស៊ើប​អង្កេត​លើការ​ជួញដូរ​វត្ថុបុរាណ​ពី​តំបន់​អាស៊ី​អាគ្នេយ៍​មក​កាន់​សហ​រដ្ឋ​អាមេរិក​។

ទាក់ទង​នឹង​ការ​ប្រគល់​វត្ថុបុរាណ​នេះ​ដែរ​ លោក​ហ៊ឹម​ ឆែម​ រដ្ឋមន្ត្រី​ក្រសួង​វប្បធម៌​ បាន​ថ្លែង​ថា​ រដ្ឋា​ភិបាល​
កម្ពុជា​ រហូត​មក​ទល់​ពេល​នេះ ​បាន​ទទួល​វត្ថុ​បុរាណ​ចំនួន​ ២៧ ​ដុំរួច​មកហើយ​ពី​ប្រជាជន ​និង​ រដ្ឋា​ភិបាល​
អាមេរិក​ ហើយ​វត្ថុបុរាណ​ទាំង​នោះ ​ឥឡូវនេះ​ត្រូវ​បាន​រក្សា​ទុក​ និង​ដាក់​បង្ហាញ​នៅ​សារមន្ទីរ​ជាតិ។​ លោក បាន​មាន​ប្រសាសន៍​ថា​៖«ការ​វិល​ត្រឡប់​មកវិញ​នូវ​វត្ថុបុរាណ​ទាំង​នេះ ​គឺ​ដូច​ជាកា​រវិល​ត្រឡប់​នូវ​ព្រលឹង​របស់​ បុព្វបុរស​ខ្មែរ​របស់​យើង​ចូល​មក​ក្នុង​ខ្លួន​ប្រាណ​វិញ​ដែរ​ បន្ទាប់​ពី​បាន​ឃ្លាត​ចាក​ឆ្ងាយ​ជាច្រើន​ទសវត្សរ៍​មក។​ នេះគឺ​ជាការ​ធ្វើឲ្យ​រាង​កាយ​មាន​ជីវិត​រស់​ឡើង​វិញ​»។

ក្នុង​ចំណោម​វត្ថុបុរាណ​ទាំង​នោះរួ​មមាន​ផ្តែរ​ទ្វារ ព្រះ​សិរទេវ​រូបភេទ​ប្រុស ​ដងខ្លួន​ទេវភេ​ទប្រុស ​បំណែក​ក្បាច់​ កញ្ចាំង​ជាដើម​ ដែល​វត្ថុ​បុរាណ​ទាំងនេះ​ត្រូវ​បាន​គេ ​ស្គាល់ថា​ស្ថិត​នៅក្នុង​សម័យ​កាល​អង្គរ ​ចន្លោះ​ពី​សតវត្សរ៍​ ទី​១០​ ដល់​ ១២​៕

1 comment:

  1. eToro is the best forex broker for newbie and advanced traders.

    ReplyDelete